انسان باقی رہے گاتب ہی عبادت اورپوجاہوسکے گی

رمضان کے سوال پریوگی نے کہا،پانچ افرادکی اجازت،مذہبی رہنماؤں کوسمجھائیں گے
لکھنو(آئی این ایس انڈیا)کورونا کی بے قابو رفتار کے درمیان، یوپی کے سی ایم یوگی آدتیہ ناتھ نے تہواروں، مذہبی تقاریب کے حوالے سے ایک بیان دیا۔ انہوں نے کہاہے کہ جب انسان ہوگاتب ہی وہ عبادت اورپوجابھی کرسکے گا۔رمضان اوردیگر تہواروں کے بارے میں پوچھے گئے سوال پر انہوں نے کہاہے کہ اگر انسان باقی رہا تومذہب باقی رہے گا۔ اس لیے عبادت گاہ میں 5 سے زیادہ افراد جمع نہ ہوں۔سی ایم یوگی نے مزید کہاہے کہ وہ اس مسئلے پر مذہبی رہنماؤں سے بات کریں گے۔ انہوں نے کہا کہ کل اس بارے میں تمام مذہبی رہنماؤں سے تبادلہ خیال کیا جائے گا۔ ہم ان سے اپیل کریں گے۔ انسان کی زندگی کو ترجیح دی جائے گی۔ اگر آپ کورونا انفیکشن کو روکنا چاہتے ہیں تو سخت کارروائی کی پیروی کرنا ہوگی۔یوپی کے سی ایم نے کہا کہ کورونا وائرس کے انفیکشن کی دوسری لہر پہلے کے مقابلے میں زیادہ خطرناک ہے۔ ہم نے پہلی لہرکاتجربہ کیا ہے۔اسی لیے ہم نے ایک جامع حکمت عملی بنائی ہے۔ کورونا کے تمام اصولوں پر عمل کرتے ہوئے تہواروں پرپابندی لگائی ہے۔ویکسین پر جاری سیاست کے درمیان، سی ایم یوگی نے کہا کہ یوپی میں ویکسین کی کمی نہیں ہے۔ ملک میں پروگرام جاری ہے۔ یوپی میں 6 ہزار مراکز میں ویکسینیشن جاری ہے۔ ویکسین کے ضائع ہونے کو روکنے کے لیے حکمت عملی بنائی جارہی ہے۔ویکسین کی کمی کے سوال پر انہوں نے کہاہے کہ منصوبہ بندی کی سطح پر ریاستی حکومتوں کی نرمی کی وجہ سے، یہ مسئلہ سامنے آسکتا ہے، ورنہ ویکسین مناسب مقدار میں دستیاب ہیں۔ سی ایم یوگی نے کہاہے کہ ہماری کوشش ہے کہ کم ضائع ہو، زیادہ سے زیادہ لوگوں کو ویکسین دی جاسکے۔