نئی دہلی(آئی این ایس انڈیا)وزیر داخلہ امیت شاہ نے اتوار کے روز ایک ورچوئل ریلی کے ذریعے خطاب کیا۔ ریلی میں، انہوں نے اعلان کیا کہ نتیش کمارکی سربراہی میں بہار میں اسمبلی انتخابات لڑے جائیں گے۔ امت شاہ کی ریلی کے بعد آر جے ڈی لیڈر تیجسوی یادو نے ٹویٹ کیا۔تیجسوی یادو نے ایک ٹویٹ میں لکھاہے کہ ورچوئل ریلی میں نوٹوں کا بیگ کھول دیاگیا، لیکن غریبوں کی پلیٹ خالی ہے۔ عوام آپ کو گھر بیٹھنے پر مجبور کرے گی، پھر ہزاروں ڈیجیٹل انتخابی ریلی کریں۔ انہوں نے مزیدلکھاہے کہ بہارنے آج تھالی بجاکر کسان، نوجوان مخالف حکومتوں کے خلاف احتجاج کیا، کیونکہ غریبوں کا پیٹ اور تھالی خالی ہے۔ ورچوئل ریلی کے خلاف تیج پرتاپ یادو، رابڑی دیوی اور تیج پرتاپ یادوپٹنہ میں اپنی رہائش گاہ کے باہرتھالی بجاکر احتجاج کرتے ہوئے دیکھے گئے۔ اس دوران آر جے ڈی نے مزدوروں کا مسئلہ بنیادی طور پر اٹھایا۔ جو اپوزیشن کی طرف سے ایک بڑا مسئلہ ہے۔اس سے پہلے تیجسوی یادونے گھیرتے ہوئے این ڈی اے حکومت سے پوچھاہے کہ بہارکوخصوصی ریاست کادرجہ،اسپیشل پیکیج اورسواالاکھ کروڑروپیے کب ملیں گے؟کیایہ صر ف الیکشن کے وقت ہی کہاجائے گا؟ہفتے کے روزتیجسوی یادو پارٹی کے دفتر پہنچے اور کارکنوں کے ساتھ پارٹی دفتر کی دیواروں پر نتیش کمار سے پوچھتے ہوئے کچھ پوسٹر چسپاں کیے۔چنانچہ اسی وقت نتیش کمار، جو گذشتہ 75 دنوں میں ایک بھی پریس کانفرنس نہیں کررہے ہیں، وہ ویڈیو کانفرنسنگ کے ذریعے پارٹی کارکنوں سے بات چیت کررہے ہیں، ظاہر ہے کہ انتخابات سے قبل نتیش کسی پارٹی کارکن کی نبض تلاش کرناچاہیں گے۔
