نئی دہلی:جامعہ ملیہ اسلامیہ کے مختلف ہاسٹل میں مقیم ریاست بہار کے مختلف حصوں سے تعلق رکھنے والے طلباءو طالبات کی ایک بڑی تعداد جمعرات کو یونیورسٹی کے زیر اہتمام 5 خصوصی بسوں کے ذریعے اپنے گھروں کے لئے روانہ ہوگیے ۔ یہ طلباء کوویڈ 19 میں لاک ڈاؤن کے پیش نظر ہاسٹل میں پھنس گئے تھے۔
بسیں کٹیہار ، پورنیہ ، مظفر پور ، نالندہ اور بھاگل پور اضلاع کے لئے روانہ ہوئیں ، جن میں ہرایک بس کے ساتھ تقریبا 130 طلبہ پر مشتمل گروپ لیڈر شامل ہیں ۔ مغربی بنگال کے 3 طلباء بھی کٹہار جانے والی بس میں سفر کر رہے ہیں ‘وہ کٹیہار میں ہی اتریں گے اور اپنی سہولت سے مغربی بنگال کا سفر کریں گے۔ طلباء کے ساتھ ہر بس میں یونیورسٹی کے دو محافظ (سابق فوجی جوان) بھی گئے۔
5 مقامات میں بہار کے 30 اضلاع کا احاطہ کیا جائے گا۔ طلباء اپنے آبائی اضلاع کے قریب اتریں گے۔ یونیورسٹی کے چیف پراکٹر کے ذریعہ تمام 30 اضلاع سمیت بہار حکومت اور مقامی انتظامیہ کو سفری تفصیلات سے متعلق آگاہ کیا جا چکا ہے۔لاک ڈاؤن کے مد نظر یونیورسٹی بند کردی گئی ہے اور طلبا کی درخواست پر یونیورسٹی نے بہار اور دہلی حکومتوں کے عہدیداروں کے ساتھ بات چیت کی اور یونیورسٹی کے زیر اہتمام خصوصی بسوں میں ان کے سفر کی اجازت طلب کی۔
بخار اور کورونا وائرس سے وابستہ دیگر علامات کی وجہ سے طلباء کی اسکریننگ اور دیگر رسمی مراحل مکمل کرنے کے لئے دہلی حکومت کے صحت مرکز کے لئے بسیں روانہ ہوگئیں۔ یونیورسٹی کے ذریعہ طلباء کو کھانے کے پیکٹ ، پانی کی بوتلیں ، ہینڈ سینیائٹرز اور ماسک بھی فراہم کیے گئے۔ کیمپس سے باہر جانے سے پہلے بسوں کو سینٹائز کیا گیا تھا ۔
اس موقع پر وائس چانسلر پروفیسر نجمہ اختر نے اطمینان کا اظہار کرتے ہویے امید ظاہر کی کہ انشاء اللہ یہ طلباء کل تک اپنے گھروں کو بحفاظت پہنچ جائیں گے اور وہ اپنے اہل خانہ کے ساتھ رہیں گے جیسے جموں و کشمیر اور جھارکھنڈ کے طلباء کو خصوصی انتظامات کے ذریعہ یونیورسٹی کے کے زیر اہتمام ان کے گھروں کو بھیجا گیا تھا۔
طلبا کی مدد کے لئے ڈین اسٹوڈنٹس ویلفیئر (ڈی ایس ڈبلیو) اور ان کی ٹیم ، چیف پراکٹر اور ان کی ٹیم ، پروووسٹ ، وارڈینز اور دیگر انتظامی عملہ ڈی ایس ڈبلیو آفس میں موجود تھے ، جہاں سے بس اسکریننگ سنٹر کے لئے روانہ ہوئی۔ طلباء کی سہولت کے لئے اسکریننگ سنٹر میں چیف پراکٹر پروفیسر وسیم اے خان اور دیگر اساتذہ بھی موجود تھے۔
کووڈ 19 کی وجہ سے سےیونیورسٹی بند ہے، تاہم آن لائن تدریس کا عمل جاری ہے ۔ یونیورسٹی باقاعدہ طور پر اگست 2020 میں دوبارہ کھلے گی۔ ان حالات میں ہاسٹلز میں مقیم طلباء اپنے گھروں میں جانا چاہتے ہیں اور یونیورسٹی ان کے سفر کا انتظام کرکے ، متعلقہ ریاستی حکومتوں کے ساتھ بات چیت کرکے ان کی مدد کر رہی ہے۔
