بنگال میں انتخابات جیتنے کیلئے بی جے پی فرقہ وارانہ ماحول پیدا کررہی ہے: ممتا بنرجی

کولکاتہ (آئی این ایس انڈیا)مغربی بنگال کی وزیر اعلی ممتا بنرجی نے ہفتے کے روز بی جے پی پر الزام لگایا کہ وہ اسمبلی انتخابات جیتنے کے لئے ریاست میں فرقہ وارانہ ماحول پیدا کررہی ہے۔ ترنمول کانگریس کی سربراہ نے جنوبی 24 پرگناس ضلع کے ریدگھی میں انتخابی ریلی سے خطاب کرتے ہوئے مسلمانوں سے بھی مطالبہ کیا کہ وہ حیدرآباد کی حمایت یافتہ پارٹی اور اس کے بنگال کے اتحادیوں کے جال میں نہ پھنسیں، جو ووٹوں کو پولرائز کرنے آئے ہیں۔ انہوں نے یہ تبصرہ اسدالدین اویسی کی زیرقیادت اے آئی ایم آئی ایم اور عباس صدیقی کے آئی ایس ایف کو نشانہ بناتے ہوئے کیا۔اویسی اور صدیقی دونوں اس سے قبل ٹی ایم سی کے الزامات کو مسترد کر چکے ہیں۔ آئی ایس ایف،سی پی آئی (ایم) اور کانگریس اتحاد کے ساتھ الیکشن لڑ رہی ہے۔ ٹی ایم سی کے سربراہ نے ہندوؤں سے بھی مطالبہ کیا کہ وہ بی جے پی کے فرقہ وارانہ جھڑپوں کو اکسانے کے خلاف ڈٹ جائیں اور علاقوں میں پریشانی پیدا کرنے کے لئے بھیجے گئے بیرونی افراد کا بھگانے کا بھی مطالبہ کیا۔ ممتا نے کہا کہ میں بھی ایک ہندو ہوں گھر سے نکلنے سے پہلے ہر روز چندی منتر پڑھتی ہوں۔ لیکن میں ہر مذہب کی عزت کرنے کی اپنی روایت پر یقین رکھتی ہوں۔

Leave a Reply

Your email address will not be published.