نئی دہلی:صدر جمہوریہ ہند جناب رام ناتھ کووند نے آج نئی دہلی میں قومی کارپوریٹ سماجی ذمہ داری ایوارڈس (این سی ایس آر اے) تقسیم کیے۔ این سی ایس آر اے کمپنی اُمور کی وزارت کی جانب سے کارپوریٹ سماجی ذمہ داری کے شعبے میں دیے جانے والے غیرمعمولی تعاون کے اعتراف کی غرض سے تشکیل دیے گئے ہیں۔
اس موقع پر اظہار خیال کرتے ہوئے صدر جمہوریہ ہند نے کہا کہ انہیں اس امر کی خوشی ہے کہ سماج کے وہ طبقات جنہیں سب سے زیادہ امداد کی ضرورت ہے وہ سی ایس آر سرگرمیوں سے مستفید ہونے والے اہم استفادہ کنندگان میں شامل ہیں۔ انہوں نے کہا کہ اس لحاظ سے کارپوریشنوں نے قومی اہداف کے تئیں قابل قدر تعاون پیش کیا ہے۔ یہ ادارے قومی ترقی میں اپنا تعاون زیادہ سے زیادہ مساویانہ معاشرے کی تشکیل کے اہداف کے حصول کی کوششوں میں مددگار ہوکر دے رہے ہیں۔ انہوں نے ہمہ گیر پروجیکٹوں پر توجہ مرکوز کررکھی ہے جن کے توسط سے طویل المدت اثرات مرتب ہوں گے۔
صدر جمہوریہ ہند نے کہا کہ عام طور پر سی ایس آر پہل قدمیوں کو صحت عامہ، تعلیم، روزی روٹی، آبی تحفظ، صفائی ستھرائی اور فطری وسائل کے انتظام سے مربوط کرکے دیکھا جاتا ہے۔ انہوں نے توقع ظاہر کی کہ موجودہ دیرینہ چنوتیوں کو حل کرنے کیلئے تنوع کا راستہ اپنایا جائیگا اور سی ایس آر سرگرمیاں اس سلسلے میں ایک باقاعدہ راستہ نکالیں گی۔
صدر جمہوریہ ہند نے کہا کہ حکومت سی ایس آر کے سلسلے میں کافی حساس اور بیدار ہے اور اسے زیادہ مؤثر شکل میں دیکھنا چاہتی ہے ، ماہ ستمبر میں سی ایس آر سرگرمیوں کا دائرہ کار بڑھایا گیا تھا تاکہ تحقیقی کاموں سے جڑے ہوئے زیادہ سےزیادہ افراد کے زمرے کو اس کے تحت لایا جاسکے۔ تحقیق اور ترقیات پر یہ توجہ اختراع کاروں کو زبردست مدد فراہم کرے گی۔ انہوں نے کہا کہ یہ چیز اتنی ہی اہم ہے کہ کارپوریٹ کلچر میں سماجی بہبود کے پہلو کو بھی شامل کیا جائے۔ انہوں نے کارپوریٹ اداروں سے کہا کہ وہ اپنے ملازمین کو اس اعلیٰ خدمت کی جانب راغب کریں اور انہیں اس کے تئیں حساس بنائیں تاکہ وہ سماج کے حاشیے پر زندگی بسر کرنے والوں کی ضروریات کے تئیں حساس بن سکیں۔ انہوں نے کہا کہ یہ واحد قدم ایسا ہوگا جو عوام الناس کے مابین خیرسگالی پیدا کریگا اور وہ خوشحالی کے راستے پر گامزن ہوسکیں گے۔
نیوز ان پٹ پی آئی بی
