پٹنہ(آئی این ایس انڈیا) تاریخی خدا بخش اورینٹل پبلک لائبریری کے ایک بڑے حصہ کو بہار حکومت کے ذریعہ فلائی اوور کے نام پر منہدم کئے جانے کے منصوبہ کیخلاف سابق آئی پی ایس آفیسر امیتابھ کمار داس نے ایک بڑا فیصلہ لیا ہے، اپنا اس منصوبہ کے خلاف احتجاجاً پولیس میڈل صدر جمہوریہ ہند کو واپس کر دیا ہے۔امیتابھ کمار داس نے ملک کے صدر رام ناتھ کووند کو لکھے خط میں کہا ہے کہ بہار کے وزیر اعلی نتیش کمار نے بدعنوان ٹھیکیداروں اور ٹینڈر مافیا کے حکم پر پٹنہ میں تاریخی خدا بخش لائبریری کے کچھ حصوں کو مسمار کرنے کا فیصلہ کیا ہے، خدا بخش لائبریری پوری انسانیت کی وراثت ہے۔ یہ ہندوستان کی گنگا – جمنی تہذیب کی علامت ہے،پورا بہار اس عظیم وراثت پر فخر کرتا ہے، کتابوں سے محبت کرنے والے کی حیثیت سے مجھے حکومت بہار کے فیصلے سے گہرا صدمہ ہوا ہے، ایک عرصہ تک آئی پی ایس آفیسر کی حیثیت سے ملک کی میں نے خدمت کی ہے،بہار حکومت کے ذریعہ پٹنہ کی خدا بخش لائبریری کے ایک حصہ کو مسمار کرنے کے فیصلہ کیخلاف احتجاجاً بھارت سرکار کے ذریعہ دیئے گئے پولیس میڈل کو واپس کرتا ہوں۔سابق آئی پی ایس امیتابھ کمار داس نے مزید کہا کہ خدا بخش اورینٹل پبلک لائبریری کو منہدم ہونے سے بچانے کے لئے شروع کی گئی مہم ’ہر شخص، خدا بخش‘کے تحت انہوں نے صدر جمہوریہ ہند کو اپنا پولیس میڈل واپس کر دیا ہے۔ انہوں نے ملک بھر میں تعلیم اور ادب سے وابستہ لوگوں سے اپیل کی ہے کہ جنھیں پدم شری یا ساہتیہ اکیڈمی ایوارڈ ملا ہے، وہ بھی خدا بخش اورینٹل پبلک لائبریری کو منہدم ہونے سے بچانے کے لئے حکومت کو اپنے اعزاز واپس کریں، تاکہ خدا بخش اورینٹل پبلک لائبریری کو سرکار کے ذریعہ منہدم ہونے سے بچایا جاسکے۔
