نئی دہلی:جسٹس شرد اروند بوبڈے ملک کے 47ویں چیف جسٹس ہوں گے۔صدرجمہوریہ ہندرام ناتھ کووند نے ان کے نام پر مہرلگادی ہے۔صدر نے سپریم کورٹ کے جج شرد اروند بوبڈے کو سپریم کورٹ کا اگلا چیف جسٹس مقرر کیا ہے وہ 18 نومبر 2019 کوچیف جسٹس کے طورپرحلف لیں گے اور اپنی نئی ذمہ داری سنبھالیں گے۔جسٹس شرد اروند بوبڈے 23اپریل 2021تک چیف جسٹس کے طورامورکوانجام دیں گے۔
قابل ذکرہے کہ جسٹس شرد اروند بوبڈے 12 اپریل 2013 سے سپریم کورٹ کے جج کی حیثیت سے خدمات انجام دے رہے ہیں۔ اس سے پہلے انہوں نے 16 اکتوبر 2012 کے بعد تقریباً 6 ماہ کے لئے مدھیہ پردیش ہائی کورٹ کے چیف جسٹس کی حیثیت سے خدمات انجام دی ہیں۔وہ 29 مارچ 2000 سے بامبے ہائی کورٹ کے ایڈیشنل جج بھی رہے ہیں اور 28 مارچ 2002 سے مستقل جج ہیں۔
جسٹس بوبڈے 24 اپریل 1956 کو پیدا ہوئے تھے۔انہوں نے 13 ستمبر 1978 کو ایک وکیل کی حیثیت سے اپنی پریکٹس شروع کی تھی۔انہوں نے ناگپور میں ہائی کورٹ کی بنج اور ناگپور میں ڈسٹرکٹ کورٹ میں اپنی پریکٹس شروع کی تھی۔ وہ وقتاً فوقتاً بامبے میں ہائی کورٹ میں بھی وکیل کی حیثیت سے خدمات انجام دیتے رہے اور وہ سول، آئینی، لیبر، کمپنی، الیکشن اور ٹیکس کے معاملات میں سپریم کورٹ میں بھی پریکٹس کرتے رہے۔ انہیں آئینی، انتظامی، کمپنی، ماحولیات اور چناؤ قوانین میں خاص مہارت حاصل ہے۔
