نئی دہلی(آئی این ایس انڈیا) آل انڈیا مجلس اتحاد المسلمین (اے آئی ایم آئی ایم) کے صدر اسد الدین اویسی نے وزیر اعظم نریندر مودی کو متنبہ کیا ہے کہ وہ دوبارہ ملک میں لاک ڈاؤن نہ لگائیں۔ انہوں نے کہا ہے کہ اگر وزیر اعظم مودی بڑھتے ہوئے کورونا وائرس کے درمیان مارچ 2020 کی غلطی کو دہراتے ہیں تو یہ بہت مشکل ہوگا۔اے آئی ایم ایم کے رکن پارلیمنٹ نے الزام لگایا کہ وزیر اعظم مودی پانچ ریاستوں کے اسمبلی انتخابات کے نتائج کے بعد ایک بار پھر ملک میں لاک ڈاؤن لگاناچاہتے ہیں۔ اویسی نے اپنی تقریر کی ایک ویڈیو سوشل میڈیا پر شیئر کی ہے۔ ویڈیو میں وہ کہہ رہے ہیں کہیں ایسا نہ ہو کہ مغربی بنگال، آسام، تمل ناڈو اور پڈوچیری میں اسمبلی انتخابات کے نتائج 2 مئی کو آنے کے بعد وزیر اعظم مودی رات آٹھ بجے آئیں گے اور کہیں گے، بھائیوں، بہنوں آج سے لاک لاک ڈاؤن۔اویسی نے کہاکہ یہ بہت بڑا دھوکہ ہوگا جب بی جے پی انتخابات ختم ہونے کے بعد ملک گیر لاک ڈاؤن کا اعلان کرے گی۔ انہوں نے کہا کہ اگر لاک ڈاؤن دوبارہ نافذ کردیا گیا تو غریب برباد ہوجائیں گے۔ انہوں نے کہا کہ مارچ 2020 میں وزیر اعظم مودی کے لاک ڈاؤن کے ساتھ ہی 10 کروڑ لوگوں کی ملازمتیں ختم ہوگئیں اور تقریبا 25 سے 30 لاکھ افراد کی تنخواہ کم ہوگئی۔
