اسلام آباد (آئی این ایس انڈیا) پاکستان میں گزشتہ چوبیس گھنٹوں کے دوران کرونا کے شکار مزید 142 مریض ہلاک اور چار ہزار سے زیادہ نئے کیسز رپورٹ ہوئے ہیں۔ بھارت میں بھی مسلسل چھٹے روز تین لاکھ سے زیادہ کیسز سامنے آئے ہیں۔دنیا کے کچھ ممالک نے کرونا ویکسین لگوانے والوں کو ویکسین پاسپورٹ کے نام سے دستاویز جاری کی ہے تاکہ ان کا سفر مختلف سرگرمیوں کے لیے محفوظ ثابت ہو۔ لیکن بائیڈن انتظامیہ نے واضح کیا ہے کہ امریکہ میں ایسا کوئی نظام رائج نہیں کیا جائے گا۔ وہیں آسٹریلوی کرکٹر پیٹ کمنس نے آکسیجن کی خریداری کے لیے بھارت کو 50 ہزار ڈالر عطیہ دینے کا اعلان کیا ہے۔فاسٹ بالر پیٹ کمنس ان دنوں بھارت میں ہی موجود ہیں اور وہ آئی پی ایل کی ٹیم کوکلتہ نائٹ رائڈرز کا حصہ ہیں۔کمنس نے اپنے ایک ٹوئٹ میں کہا کہ بھارت سے انہیں لگاؤ رہا ہے اور یہاں کے لوگوں نے انہیں بہت پیار دیا ہے اس لیے وہ دیگر کھلاڑیوں کو بھی کہیں گے کہ مشکل کی اس گھڑی میں بھارتی عوام کی مدد کریں۔جب کہ پاکستان میں گزشتہ چوبیس گھنٹوں کے دوران کرونا وائرس کے شکار مزید 142 مریض دم توڑ گئے ہیں جب کہ 4487 افراد میں وائرس کی تشخیص ہوئی ہے۔سرکاری اعداد و شمار کے مطابق ملک بھر میں گزشتہ روز 43 ہزار 981 کرونا ٹیسٹ کیے گئے جن میں مثبت کیسز کی شرح 10 اعشاریہ دو فی صد رہی۔پاکستان میں ایکٹو کیسز کی مجموعی تعداد میں مسلسل اضافہ ہو رہا ہے جو 87 ہزار سے تجاوز کر گئے ہیں۔حکومتِ پاکستان نے ایک ٹوئٹ میں بتایا ہے کہ 40 سال سے زائد عمر کے افراد کو ویکسین لگانے کے لیے رجسٹریشن کا آغاز کر دیا گیا ہے۔رجسٹریشن کے لیے 40 سال سے زائد عمر کے افراد کو اپنا شناختی کارڈ نمبر 1166 پر بھیجنا ہو گا۔
