قاہرہ (آئی این ایس انڈیا)القاعدہ تنظیم کے بانی اسامہ بن لادن سے متعلق ڈرامہ سیریل “القاہرۃ ابول” (قاہرہ کابل) کے سرکاری پوسٹر کے منظر عام پر آنے کے چند گھنٹوں بعد ہی سماجی رابطے کی ویب سائٹوں پر ہلچل مچ گئی۔پوسٹر میں مصری اداکار طارق لطفی نظر آ رہے ہیں۔ انہوں نے ڈرامہ سیریل میں القاعدہ تنظیم کے سابق سربراہ اسامہ بن لادن کا کردار ادا کیا ہے۔ پوسٹر میں فن کاروں کی بھی تصویر ہے۔اس ڈرامہ سیریل میں 1990کی دہائی کے اواخر میں عرب دنیا اور مصر میں دہشت گردی کے منصوبوں کے پس پردہ عوامل پر روشنی ڈالی گئی ہے۔ یہ سیریل آئندہ رمضان کے دوران نشر کی جائے گی۔مصری اداکار فتحی عبدالوہاب نے ڈرامہ سیریل کا سرکاری پوسٹر جاری کیا۔ خاتون فن کار حنان مطاوع نے ڈرامے میں ایک باحجاب نوجوان لڑکی کا کردار ادا کیا ہے۔ ان کا کہنا ہے کہ ڈرامے میں ان کی شخصیت پیچیدہ جذبات سے بھرپور ہے۔ڈرامہ سیریل کے لکھاری عبدالرحیم کمال اور ہدایت کار حسام علی ہیں۔ اس ڈرامے کو گذشتہ برس رمضان میں پیش کیا جانا تھا مگر کرونا وائرس کے پھیلاؤ کے سبب اس کا نشر کیا جانا ملتوی کر دیا گیا۔چند روز قبل ڈرامہ سیریل کے پیش کار تامر مرسی کا کہنا تھا کہ یہ ڈرامہ انتہا پسندی کو سمجھنے اور دہشت گردی کے خطرے سے آگاہی فراہم کرنے کی ایک نئی کوشش ہے۔ سوشل میڈیا پر مختلف حلقوں نے ڈرامہ سیریل کے سرکاری پوسٹر کو مثبت طور پر لیا۔ بہت سے لوگوں کے مطابق یہ آئندہ رمضان کے دوران میں پیش کی جانے والی ایک اہم ترین ڈرامہ سیریل ہو گی۔
